गेरुवा । बर्दियाको गेरुवा गाउँपालिकाका किसानहरुले किसान संघर्ष समिति गठन गरेका छन । किसानहरु हरेक क्षेत्रबाट ठगिएको भन्दै त्यस विरुद्ध एकजुट हुन हुकुम बहादुर चलाउनेको संयोजगत्वमा २५ सदस्यीय संघर्ष समिति गठन गरिएको हो ।
गेरुवा गाउँपालिका वडा नं. ३ स्थित रोशन कटेजमा गठन गरिएको संघर्ष समितिको उपाध्यक्षमा राधा कुमारी चौधरी, गीता कडायत, सचिवमा मंगल प्रसाद चौधरी, सह–सचिवमा जंग बहादुर चलाउने, कोषाध्यक्षमा सुनकोशी थारु लगायत पदाधिकारी रहेका छन ।
यस्तै संघर्ष समितिलाई थप बलियो बनाउन कोइराला प्रसाद चौधरीको संयोजगत्वमा ७ सदस्यीय सल्लाहकार समिति समेत गठन गरिएको छ । गेरुवा गाउँपालिकाका ६ वटै वडाका किसानहरु समेटेर संघर्ष समिति गठन गरिएको छ । कार्यक्रममा बोल्दै संघर्ष समितिका संयोजक हुकुम बहादुर चलाउनेले किसानहरु एक ढिक्का नभएसम्म सधै ठगिरहनुपर्ने अवस्था आउने बताउनुभयो ।
‘किसानहरु जोताई, कुटाईसँगै आफुले उत्पादन गरेको बालीनाली बेच्ने समयमा पनि ठगिनुपर्ने अवस्था रहेको छ ।’ संयोजक चलाउनेले भन्नुभयो, ‘फरहरुमा पल्लेदारी तपाई हामीले बालीनाली बेचे बापत त्यसैबाट काछिन्छ । पल्लेदारीहरु त फरबालाका हुन पैसा त फरबालाले दिनुपर्ने तर किसानबाट पैसा लगिन्छ । किसानहरु हरेक ठाउँबाट ठगिनु परेको छ ।’
संयोजक चलाउनेले सबै किसानहरु एक जुट भई किसानहरुको हक अधिकार सुनिश्चित गर्ने, कृषिमा देखा परेका वेतिथी, विसंगती उजागर गर्दै समाधानको बाटो लिन संघर्ष समिति गठन गरिएको बताउनुभयो । संघर्ष समितिले आफ्ना एजेण्डाहरु सहित राजनैतिक दलहरुसँग अनुमोदन गर्दै संघर्षका कार्यक्रहरु अगाडी बढाउने जनाएको छ ।
